إحياء

بكتب الكلام ده و على وشك اني اعيط بس مش عايزة اقلب يومي عياط
بكتب عشان اشتقت بشدة لإحياء
اشتقت لصحبة بجد "مهما نقع نقدر نقوم نشق نتحدى الغيوم نلاقي ليلنا ألف يوم بس احنا نحلم"
أنا فاكرة أول يوم إحياء و كنت زهقت من thiters و رحت عيطت شوية و كنت هنقل protoziners عشان مسلي اكتر
كنا بنروح الويك اند كلها من الصبح لغاية آخر اليوم و ساعات كنت باخد المذاكرة معايا
و كنا بنشوف 'مستر' فريد قليل اوي
وللأسف ما عرفتش أحضر يوم البنك العظيم
و كان العدد قليل لدرجة اننا كنا ولاد و بنات في باص واحد و كمان في أماكن زيادة
اتبسطت جدا لما التيم بتاعي اختارتي ليدر....زودت طاقتي الإيجابية
أنا فاكرة يوم الsketches وكان في ناس بتضحك اوي
وفاكرة اما الكوتشز عملوا الsketch اللي نتعلم منه
كانت رسالتهم يقولوا لنا اننا لينا هدف واحد نوصل له وهو الجنة لكن أكيد هيكون في عوائق في نص طريقنا للجنة إن شاء الله
سواء شيطان أو صحبة سوء
أهم حاجة اننا كنا في الAUC وكنا أهم حاجة بنتغدى هناك و كان في محل واحد يعتبر بس هو اللي بيبقى فاتح
كان في يوم الهوا كان قوي جدا لدرجة ان الشمسيات كانت بتقع
كان حلو ان ما كناش بس بنبيع برودكت
ﻷ الحمد لله اننا اتعلمنا حاجات تانية
مثلنا و صورنا فيديوهات و عمرو سأل مدرسين و صور معاهم حاجات
اتدربنا على الpresentation
كانت أيام جميلة و كنا طيبين اوي يا خال
الجميل اننا كنا بنقضي الويك اند مع إحياء...أينعم ما كنتش بلحق أذاكر بس كنت بحس اني مع أسرتي و عيلتي التانية
و دلوقتي حاسة انه بلاها نادية خليها سوسو
يعني بلاها مذاكرة...اللي فرق معايا بجد و لسة محفور في الذاكرة هس إحياء
و الحمد لله بجد ان يسر خلتني أنضم لعيلتي الثانية

و دلوقتي لولا ظروفنا و ظروف الحياة كان زماني مكملة مع إحياء و الفكرة اني دلوقتي في أمس الحاجة إلى إحياء عشان محتاجة المساعدة في قرار ادخل ايه في الجامعة
و كان نفسي اكون دخلت من زمان وخلصت الlevels كلها :')
قدر الله وما شاء فعل
و حاسة اني على اﻷقل ما قدرتش أكمل عشان مثلا لا اتعلق بحاجة في الأول و في الآخر دنيوية

يا رب بجد ربنا يبارك في إحياء و يجعلها سبب في نفع اﻷمة و تغييرها و ربنا يرزق من فيها النية الخالصة لوجه الله إن شاء الله